Навучэнцаў каледжа ў Пінску павезлі на экскурсію ў СІЗА. Школьнікам таксама паказваюць турмы

Каля дваццаці навучэнцаў Пінскага дзяржаўнага аграрнага каледжа 27 кастрычніка наведалі следчы ізалятар № 6 у Баранавічах. Экскурсію арганізавалі для прафілактыкі правапарушэнняў і злачынстваў сярод моладзі.

Чытайце таксама: У беларускіх школах ладзяць відэасустрэчы са зняволенымі. Цяпер — нават з жаночай калоніі

Супрацоўнікі ізалятара расказалі навучэнцам, якія катэгорыі людзей утрымліваюцца ў СІЗА, па якіх артыкулах Крымінальнага кодэкса іх абвінавачваюць, а таксама патлумачылі правілы ўнутранага распарадку і рэжым установы, заўважыла група праваабронцаў «MAYDAY.team».

На экскурсіі ў турмы адпраўляюць і школьнікаў

Падобныя мерапрыемствы ладзяць і для школьнікаў. Так, 23 кастрычніка інспекцыя па справах непаўналетніх Валожынскага раёна арганізавала паездку ў турму № 8 у Жодзіне. Туды адправілі групу школьнікаў рознага ўзросту з мясцовых устаноў адукацыі, сярод іх былі і дзяўчаты.

Падчас экскурсіі дзецям паказалі калідоры рэжымных карпусоў, бетонныя дворыкі для прагулак, камеры і карцэр. Асобную ўвагу звярнулі на злачынствы, звязаныя з наркотыкамі, дзейнасць так званых «спартыкаў» і інтэрнэт-махлярства.

Жодзінская турма № 8 — адзіная ў Беларусі ўстанова такога тыпу, дзе, акрамя следчага ізалятара, ёсць спецыяльны корпус для людзей, асуджаных да пажыццёвага зняволення.

Падобныя экскурсіі ў беларускія СІЗА і турмы ўсё часцей падаюць як спосаб прафілактыкі правапарушэнняў сярод дзяцей і падлеткаў. Аднак за такой «выхаваўчай» практыкай стаіць і іншы падыход: замест размовы пра прычыны злачыннасці, правы чалавека і ўмовы ўтрымання ў месцах несвабоды школьнікам паказваюць камеры, карцэры і турэмны побыт. Гэта стварае ўяўленне, што галоўны спосаб змагацца са злачыннасцю — запалохванне пакараннем. Такія мерапрыемствы таксама нармалізуюць прысутнасць сілавых структур у адукацыйным і выхаваўчым працэсе.

Чытайце таксама: «Беларуская школа стала падобнай да зоны». Настаўнік расказаў, як вучням не даюць выйсці на свежае паветра

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро